Kardom! Lunjir kelang arat do an Phan ta. Pini nangli tum Phan Sot Recho Atomo si Thi hek pen nang than po. Kechok kechok che doan ke Diya po pusi Ning chethe lo.
Tangte tomo le pangcheng pon thu nang. Hako Pirthe Longle kangduk hut Karbi Akhei tangte kedo kedam prat jam si do a recho ave, angri angdon ave, bang chomang Akhei tangte Recho do keklem kedam angri angdon si thek long lo.
Karbi akhei angri angdon kave thek long si Ethak Songsar Recho Ningduk si Karbi karbak Akhei Phan kerai kekom, Ning isi nim isi, angri angdon kedo thek ji aphan Sot Recho Phan Pirthe nang toi lo.
Sot Recho Pirthe nang sun si Karbi karbak kedo adim an pale dam lo. Karbi tum Sot Recho Phan thek long si arju lo "Nangli komat lo? Lapen konat pen si Kevang lo? Sot Recho Abang ta chethak dun lo " Neli men ke Sot pu lapen neli Nihang pen si Kevang pusi chethak dun lo.
Sot Recho Karbi Akhei tum Phan pa chingrum si lam than lo. Eli Karbi tum ta Ning isi do nang po, keklem kedam Ning isi do nang po, Eklai vet si do nang po kedo chethak jam ke chok che lo, Etum Karbi Akhei ta chingri pet pensi Ajat Asai ta klem nang po pusi than pon pame lo.
Lason si Karbi Angbong Alang Phan kekroi atum aning kangsam atum chingvai si Sot Phan Karbi Recho kebat ji Phan chingvai lo. Sot Phan Recho bat det aphit Karbi Akhei ta chingthur dun lo, Eklai vet do rappet lo. Sot Recho alam karju pen Penang karbi tum Ning kangsam do lo lapen Enut bang hini tum ke Sot Recho Phan aning keso do kok lo.
Enut bang hini A karbi tum ke Sot Recho alam arju rong te Etum Phan ke nang chiki bang ave det po pusi matha rong lo. Lasi latum bidi kanglim pen Sot Recho Phan pathi ji aphan Mori Murong Arecho Phan than dam det lo.
Chomang Recho Karbi Akhei long ta Recho Klang etlo Lasi laphan pathi vek nang po pusi Enut bang hini Karbi tum ke hoi dam rong lo. Chomang Recho ta chakri chakor tum Phan toi si Sot Recho Phan ajo apor ingnang dam chek si ha habit haram pon det si pathi dam lot lo. Bonsita Sot Recho ke Enut Arnam a ok dokok ajoine puthot reng thu ak lo.
Lason si batai batai le pathi ta reng thu ak tt lo. Enisi ke Sot Recho Phan theng rup rup theng rai ta ingnek rong tt lo lasi Enut karbi bang pinkhat dun lo lapu kali lo a oak ingthan det ra chotun det ra cho det nang pulo. Bonsita Sot Recho puthot a oak chingthun lap si chereng thu ak lo. Puthot Pinkhat thu lapu kali lo a oak ingthan et ra phelo le jok lut noi pusi pu dun lo. Non ephong bang ke a oak ingjir lut si puthot chereng thu un eh det lo.
Sot Recho thi et aphit sining Angsong pen Karbi Akhei Phan Sot Recho dohai pi kangdet lo. Mo Pirthe Kangtang, longle kangtang ta Karbi Akhei ke kilu kelom aso Arecho kave Akhei nang peman lonang, lapen angri angdon do thek the, chingri thek the chingdon thek the Akhei nang peman lonang, lapen ne vangthuji bonta Hipi birik arong monit arlu dor kroi, voti Amek Kevang, hoton beleng Amek Kevang, long lengpum Amek Kevang, Tula kanglim, arlong kanglang an ne puthot Recho nang checho thu po pusi sining Angsong pen pu tekang lo.
Lasi matha dam meme Karbi Akhei non pu ta Ning isi ave, angri angdon ave, chingri chingdon dun thek the lake Sot Recho Adohai lo.