Karbi Akhei ahokpet kangsam jin Akhei binong pu madu Akhei ta nang chini. Bonsita khei kisung apor hut karbi tangte Karbi Ning isi do vet te chesong un jakong do puta bang nang chini.
Charchim presek Along Acham kedam Nang ke Karbi Akhei Phan kana hok the dung chenam. Karbi Akhei koan si kisung chechak nang hilang la ke etum Kevang ji lang si chini pon bom po.
Khei Angbong kacharvo ajok Adai Kave atum si kisung ta pho dun le pho dun la ke thek long prong lo kaduk kave ta. Tangte Dak komat si kechok che lo kopi alam pen si kecharvo longlok lo hemprek hang rappet Akhei pen si kacharvo dut ke Dak angbong nang ka chejok dun do kok ajoine lo Ale nang cho en dun atum do kok ajoine lo.
Hako pen ta karbi Akhei ke kebe cheche aso pu mat non pu ta son si nang plang bom lang kaprek kaprek Akhei pen charvo bom vang bom non ako adui ahoi alamki lipai Klang lilo jok ta chini hur lo don marli tum.
Lasi bang Akhei tum chini pame karbi Akhei Ning isi ave pu lasi nang akhei ke nang cho artuk rok lapu son jo. Karbi Akhei tum ke kachingri ave prungjin prungjan si do, Chesong chit ameh de ave alomso kar po mep chok lapu son.
Charchim presek 17th October 2005 Aningkan pen non 2025 an ke Ningkan ingkoi 20th kechok lo. Lasi Charchim presek Along apran kedam tum an Phan akarjong Arnam Arni akengri long kerap thek ji Phan chikimo pon bom vang bom lo.
Labang so Aron hut acham kedam tum aphai phli kep ra hini lapen isi Ning duk chejinso meme mek kri buring an pin Enut arta kijum hek chiklo ejon vet oso Phan an ta eri re det lo pathi lot.
Matha dam pen ta eh ok chung hur anpin, kepho vek tum koan aduk doji matha pen ta ok serem set. Koan kachenek kaholo, la an pin ke Arnam loma Arni loma, Hi - ih Loma akrem lo.
 |
| Karlitang Atum |
Doan Karbi ta Charchim Presek kepho tum Phan apor che en ra Chikimo hur lo nang Kevang ji lang Karbi Akhei amumang lason kisung ke pho nang ne lo lapen hodai ta pi Longri amumang Klarchen pen le pedo nang pule Hirjume Chohang dun nang.
Om Shanti!